Blir heidra med moderne handverk

På landbruksutstillinga Agroteknikk blir dei viktigaste tekniske hjelpemidla for landbruket heidra. Vinnarane blir tildelt plakettar i tre, laga på Dovre.

Det er handverkarfirmaet Motved på Dovre som lagar plakettane, slik dei også gjorde til førre Agroteknikk. Njål Andreassen og Even Hansen driv firmaet med totalt fem tilsette. Motved har spesialisert seg på det vi kan kalle moderne tresløyd: Dei har ein klassisk handverkarbakgrunn, men kombinerer dette med moderne maskiner med laser og maskinfresing.

- Dette passar veldig godt for oss som kårar nyheitene på Agroteknikk, seier Jogeir Agjeld. Han er leiar for juryen som kårar nyheitene. I år skal det delast ut fire såkalla gullaks, 20 sølvaks og minst ein spesialpris.

- Vi i juryen er også opptekne av verdsette det klassiske og tradisjonelle, nemleg den grunnleggande agronomien. Kunnskap om jord, plantar og dyr. Men samtidig må vi strekke oss inn i framtida, nyttegjere oss ny teknologi, nye metodar og nye måtar å tenke på. Vi skal heller ikkje legge skjul på at vi er ekstra stolte når norske firma, enten det er handverkarbedrifter eller maskinleverandørar, viser at dei kan levere produkt av topp klasse!

Eit anna element i dette: Landbruket tek klimaansvaret på alvor. Det ligg også inne mellom vurderingsvilkåra i nyheitskåringa på Agroteknikk. Då er nærproduserte premiar av norsk heiltre midt i blinken.

Dei gjævaste nyheitene, verdsett til “gull” får plakettar i lønn frå Oslo. Vinnarane av “sølv” får plakettar av alm som er hoggen i Asker. Det blir også delt ut spesialprisar, laga av eik frå Nodeland i Agder.

Agroteknikk-utstillinga blir arrangert 14. til 17. november på NOVA Spektrum på Lillestrøm. Det er Traktor- og Landbruksmaskinimportørenes Forening som står bak Agroteknikk.